DE »LIZA MINELLI VAN OSTFREESLAND« SNACKT UP PLATT UN HOCHDÜÜTSK


De Lüüd wachten daar up, dat ik ennelk lossabbeln do !

Annie Heger wurde in Aurich geboren und lebt heute in Berlin. Sie ist eine erfolgreiche Sängerin, Moderatorin und Schauspielerin, war der Mephisto im »Faust up Platt« im Staatstheater Oldenburg und Hallervordens Plattdeutschcoach. Das Multitalent ist Künstlerische Leiterin des Festivals »PLATTarts«, CSD-Veranstalterin und Sprecherin der Kampagne »Ehe für alle«. Für ihre Leistungen im Bereich der niederdeutschen Sprache wurde Annie Heger 2016 mit dem Literaturpreis der Stadt Kappeln ausgezeichnet. 2018 erhielt sie als erste Frau den »Wilhelmine-Siefke-Preis« der Stadt Leer. Mehr Infos auf www.annierockt.de

 

Das Gespräch auf hochdeutsch lesen ? Mehr...

 


Moin Annie ! Du kummst ut Ostfreesland, ut Spetzerfehn un hest dorvan dröömt, mal de »Liza Minelli van Ostfreesland« to worden. Hest Du van Anfang an docht, dat dat up Plattdütsk geböhren sull ?

 

Nee, dat nu wohrraftig nich. Een internationaalen Karriere hebb ik mi utmaalt, up Engelsk, villicht up Düütsk, aver heel bestimmt nich up Platt !

 

Könnt de Lüü – ok buten Ostfreesland – Di denn verstahn ?

 

Nich all. De Minschen in Bayern hebbt een groot Probleem, mi to verstahn, könnt de Leeders aver denn männigmaal ook eenfach atmosphärisch insuugen. De Witze kriegt se aver nich hen, to verstahn. Ook in Sleswig-Holsteen mutt ik aver uppassen, dat ik mien Platt so een bietje entschärfen do. Dat Fehntjerplatt ut Oostfreesland is denn doch een »anner Snack« un ook noch een bietje platter as een städtischen Bremer oder Hamborger Platt. An Anfang was dat gaar nich so eenfach för mi, daar up de Bühne umtoswitchen, nu bün ik dat aver all wennt.

 

Meenst Du, dat dat Plattdütske weer so ‘n Sort Renaissance beleevt, ok bi de junge Lüü ?

 

Jo, dat is so un dat freit mi bannig. Dat kummt daarvan, dat Heimaat un van waar Du kummst, in disse Tiet wedder leep wichtig is. Allns is hektisch, flink un nich to överblicken, denn bruukt een Wuddels, Identitätswuddels. Mit Nationaalstolt hebbt wi dat nich so, aver in Regionaalpatriotismus sünd wi echt goot ! Un bi mi persönelk lööst besünners de plattdüütsk Spraak dat kommodige Geföhl in mien Hart van Nahuuskamen ut. To glieke Tiet is Platt ook noch cool un gifft jung Lüüd een Geföhl, se höört to wat to.

 

Du leevst nu in Berlin. Giffst Du dor ok Konzerten in Plattdütsk oder doch ehrder in Hochdütsk ?

 

Ik maak in Berlin vööl up Hochdüütsk, na klaar, ik will ja, dat de Lüüd in‘t Publikum ook wat daarvan hebbt, dat se daar sitten. Aver ik laat mi dat nich nehmen, jümmers tominnst een plattdüütsk Song to singen. Dat is dat, wat mi utmaken deit, dat weten de Lüüd un wachten sogaar daar up, dat ik ennelk lossabbeln do, as mi de Snabel egens wussen is.

 

Maakt Di dat mehr Spaß, Dien Texten in Platt- of in Hochdütsk to schrieven ?

 

Dat kann man nich so genau seggen. Ik weet man blots, dat mi dat eenfacher fallen deit, up Platt to schrieven. Ik hebb futt vööl mehr Billers in d‘Kopp un Riemen.

 

Man seggt ja, Du büst so ‘n Tausendsassa. Wat makst Du denn anners noch för Skandal, ok Kabarett ?

 

Kabarett mit Vanessa Maurischat (»Eine geht noch !«), dat is würelk een lustigen Avend un up Hochdüütsk, also barrierefree för bold elk un een. Ik sing un danz mit »Sweet Sugar Swing« dör de Lannen un wi maakt so richtig rechtschapen Swingmusik. Ik bün een van de NDR »Hör mal‘n beten to !« Snuten. Ik moderier allens van Festivals, Podiumsdiskussioon, Galas, van Arenen, lüttje Theaters bit to‘t Bunnsfamilienministerium. Ik bün Aktivistin bi dat Projekt »100 % Mensch«, bün in ‘t Orgateam van d‘ CSD Nordwest, Baas van dat PLATTart-Festival, heel aktiv ook in de evangeelsch Kark, ik schriev Bökers, … un hebb dree Firmen: Een Bookingagentur, een Musikverlag un een Independent Plattenlabel.

 

Dor hest Du ja fix watt to doon … Bi Dien Konzert hier in Bremen spölt Matthias Monka ut Bremen-Nord ja Klaveer. He is ja »bloot« Begleitung, abers kann he ok Platt?

 

Ha, bloot Begleitung. Dat kannst so seggen, vör allen Dingen, wiel he kien Platt kann, aver he beseelt dat heele Programm un ik finnt, he is mehr as bloot een Begleitung. He is een echt Geschenk. Sien Platt worrd ook nu immer beter un männigmaal lacht he sogaar an de een of anner Stee.

 

Bremen is ja nich allto wied weg van Ostfreesland. Is dat för Di sowat as ‘n Heimspööl ?

 

Heimspööl is dat woll ehrder för Matthias, de ja ut Bremen kummt. Bremen is doch heel wiet weg van Oostfreesland un de Bremers hebbt doch een heel anner Mentalität as de Oostfresen. Aver ik hebb mien Heilpraktikerutbillen in Bremen maakt un daarum is dat so een bietje een Reis in mien Vergangeheet.

 

Denn Willkomen in Bremen ! Hest Du all mal in so ‘n Museum as dat Olle Pumpwark spölt ? Kannst Du Di vörstellen, wo dat woll gahn mag ?

 

Ik hebb al vööl in Kultuurzentren spöölt, de vördem anners wat weern, so as Slachthof, Pumpwark, Möhlen, Olle Weveree, … aver ik glööv noch nich daar, waar denn ook noch de old

Maschienen rumstahn. Dat worrd, glööv ik, een richtig besünnern Atmosphäre geven.  

 

Interview: Almut Heibült, Foto: Linn Marx, Interview erschienen in Ausgabe Nr. 7, 2018

 

© Linn Marx
© Linn Marx